Friday, November 9, 2018

පිස්සන්ට කලින් දොස්තර කලබල වීම





මහා බ්‍රිතාන්‍යයේ පළවෙනි ජෝරජ් රජ්ජුරුවෝ ඉංග්‍රීසි දන්නෙ නෑ කියනවනේ. හේතුව ඔහු ජර්මන් වංශයකින් පැවතෙන්නෙක් වීම. ඉංග්‍රීසි දන්නෙ නැති වුනත් බ්‍රිතාන්‍යයේ රජ්ජුරුවෝ . පළවෙනි ජෝරජ්ගේ ඉංග්‍රීසි නොදන්නාකම හේතුවෙන් ඊළඟට වෙන දේ තමයි මනුස්සයා කැබිනට් එකට යන්නෙ නැතිවීම.  ගියත් යන්නෙ කලාතුරකින්. මේ හින්දම ජෝරජ් රජ්ජුරුවෝ වෙනුවෙන් කැබිනට් එකේ වැඩකටයුතු බලාගන්න වෙන්නේ  වොල්පෝල් කියල කෙනෙක්. මේ   වොල්පෝල් ගේ බලය ටිකෙන් ටික වැඩිවෙලා තමයි පසුකාලීනව 'අගමැති' කියන තනතුර බිහිවෙන්නේ. ⁣කෙටියෙන් ගත්තොත් ලෝකේට අගමැති කියන තනතුරක් බිහිවෙන්නේ පළවෙනි ජෝරජ් රජුජුරුවන්ගේ ඉංග්‍රීසි නොදන්නාකම.


  ඊට සියවස් තුනහමාරකට විතර පස්සෙ ලංකාවේ අගමැති ⁣කෙනෙක් බිහිවෙනවා.ඔහු ඉංග්‍රීසි ත් දන්නවා සිංහලත් දන්නවා . හැබැයි ඔහුටත්  කැබිනට් රැස්වීමක් මෙහෙයවන්න , අගමැති විදියට පාර්ලිමේන්තුව   අැමතීමට විතරක් නොවෙයි පාර්ලිමේන්තු පරිශ්‍රය ට අඩිය තියන්නවත් ඉඩක් හිමිවෙන්නේ නෑ.  හේතුව තමයි ලංකාවේ පාලනය කරන්නේ තීන්දු තීරණ ගන්නේ පිස්සො ටිකක් වීම සහ බහුතරයක් නැති වෙලාවක්  මේ විකාර සහගත අගමැතිකම පැනලා ගන්න තරම් අහේනියක් තියෙන එකෙක් සිටීම . මේක මොනතරම් ආතල්ලන්තයක්ද කිව්වොත්  රෑ හතට තමන්ගේ ඉස්සරහ ඇමතිවරු දිවුරුම් දෙන ජනාධිපති උත්මාණන් ඒ ඇඳුම පිටින්ම රෑ නවයට පාර්ලිමේන්තුව විසුරුවනවා. ඉතින් මේක අාතල් ඩිස්නිලන්තයක් නොවෙයිද. මෑතකදි  ලංකාව ගැන හරිම විග්‍රහයක් කරේ ජගත් මනුවර්ණ. උෟ කිව්ව හරි. මේක ඩිස්නිලන්තයක් . මහා උන් ට හිතෙන හිතෙන දේවල් උන් කියනවා උන් කරනවා.මෙහෙම රටකට warn කරන බටහිර රටවල් ඉන්නවානම් උන්ටත් පිස්සු . උන් හරිනම් කරන්න ඕනේ මෙච්චරයි . පුලුවන් තරම් ලංකාවට අාතල්ලන්තයක් හැටියටම develop වෙන්න ඉඩ දෙන්න ඕ⁣නේ. එතකොට උන්ටත් පුලුවන් පොඩි මොංගල් ගතියක් දැනුණ දවසක ටිකට් එකක් අරන් ප්ලේන් එකෙන් ඇවිත් පොඩි ආතල් එකක් අරන් අපි ඉන්නෙ සැපේ කියල බලල යන්න.

Wednesday, July 11, 2018

මරණ දඬුවම ඕනේ (නෑ)

 මරණ දණ්ඩනය, සාමාන්‍යයෙන් අවුරුදු 5කට 10 කට සැරයක් අපේ රටේ උඩට එන මාතෘකාවක්. අපරාධ රැල්ල වැඩිවීගෙන එනවා වගේ දැනුන ගමන් මරණ දණ්ඩනය ගැනත් ආයේ ආයේ කතා කරනවා. ආයේම ටික දවසකින් නැතිවෙලා යනවා .

   Amnesty International එක කියන විදියට 2017 අවුරුද්දේ විතරක් ලෝකේ මරණ දණ්ඩනය ක්‍රියාත්මක කරලා තියෙනවා 993ක් ( චීනයේ ගණන නැතිව). මතක තියා ගන්න මේ ඉලක්කම ඇතුලට අපේ රටේ වගේ කුප්‍රකට "සැඟවූ ආයුධ පෙන්වීම" වගේ concept ඇතුලත් නෑ. ආයුධ පෙන්වීමට ගිහින් මරණ එකත් රාජ්‍යය මැදිහත් වීමෙන් කරන එක්තරා මරණ දණ්ඩනයක් තමයි. ඒ වගේම චීනෙන් එන මරණ දණ්ඩනය ලක්වූ ප්‍රමාණය 1000 කට වඩා වැඩී. චීනය මේ සංඛ්‍යාලේඛණ රාජ්‍ය රහසක් හැටියට තියා ගන්න නිසාම මේ ඉලක්කම මීට වැඩිය වැඩිවෙන්න තියෙන ඉඩ හුඟක් වැඩී.
  මේ තමයි 2017 අවුරුද්දෙ නිළ වශයෙන් මරණ දණ්ඩනය ක්‍රියාත්මක කරපු රටවල්:
China , Iran, Saudi arabia , Iraq , Pakistan ,Egypt , Somalia , USA, Jordan ,Singapore ,Kuwait ,Bangladesh ,Palastene, Afghanistan ,Malaysia ,Japan, South Sudan,Baharain ,Yemen, Belarus, UAE, North Korea  & Vietnam .

 මේ රටවල් වලිනුත් ඉදිරියෙන්ම ඉන්නෙ මෙයාලා:
Chaina - 1000+
Iran -       500+
Saudi Arab - 145+
Iraq - 125+
Pakistan - 60+
Egypt - 35+
Somalia - 20+
USA - 20 +

ඊට කලින් අවුරුදු වල ඔය ලිස්ට් එක බැලුවනම් ඒත් මේ රටවල් ටික ඒ විදියටම තියෙනවා. මං හිතන්නේ ඒ point එක උනත් ඇති death sentence වල සාර්ථක අසාර්ථකත්වය ගැන යම් අදහසක් ගන්න.

  මරණීය දණ්ඩණයේ තියෙන ලොකුම අවුල තමයි නීතිය පසිඳලන තැන් වල වෙන අඩුපාඩු හේතුවෙන් වෙන ඇත්තටම වරදකරුවන් නොවන මිනිස්සු මරණයට පත් වෙන එක. ඇමෙරිකාවේ බැලුවොත් එහෙම සිදුවීම් ඕනෙ තරම් වාර්තාවෙලා තියෙනවා. මොකක්හරි වරදකට සම්බන්ධයෙන් කවුරුහරි වරදකරුවෙකුට මරණ දණ්ඩනය ක්‍රියාත්මක කරල කාලයක් ගියාම වෙන කවුරුහරි ඇවිල්ලා පාපොච්චාරණය කරනවා ඒ වරද කරේ මම මිය ගිය පුද්ගලයා නිර්දෝෂයි කියලා. මේ පාපෝච්චාරණය කරපු අය විතරයි. තමන්ගේ වරද වෙනුවෙන් වෙන එකෙක් මරණයට පත් වෙනවා බලාගෙන ජීවත්වෙන අය තව ඇති තරම් ඇති. දැන් මේ වගේ අවස්ථාවක මොකද කරන්නේ.? අර නිවැරදි 'වරදකරුට' නැවත පණ දෙන්නද?  ඒ මිනිස්සුන්ගෙ පවුල් වලට දෙන පිළිතුරු මොනවද?

  අනෙක් කාරණය තමයි ඒ ඒ රටවල් වල දේශපාලනය සහ නීතිය ක්‍රියාත්මක වීම කියන එක අතර සම්බන්ධය මත තීන්දු වෙනස් වෙන එක. දැන් අපි බැලුවොත් දුමින්ද සිල්වා දිහා.මනුස්සයාට මරණ දණ්ඩනය හිමි වෙලා ඉන්නේ. 2015 ආණ්ඩුව වෙනස් වුනේ නැත්නම් දුමින්ද සිල්වට එහෙම තීන්දුවක් ලැබෙයි කියල අපිට හිතෙන්නෙ නෑනේ නේද. ආණ්ඩු මාරු නොවුනනම් මේ වෙද්දි දුමින්ද සිල්වා පාර්ලිමේන්තු මන්ත්‍රී කෙනෙක්. සමහර විට නීතිය හා සම්බන්ධ ඇමති තනතුරක් වුනත් මිනිහ දරන්න තිබුණා. පේනවනේ අපේ වගේ රටවල් වල දේශපාලන බලවතුන්ට පුලුවන් අධිකරණයට බලපෑම් කරන්න. වැරදි කරුවන් ආරක්ෂා කරන්නට වගේ නිවැරදි කරුවන් වැරදි කරුවන් කරන්නට. ඉතින් අපේ වගේ රටක මරණ දණ්ඩනය ක්‍රියාත්මක වුනොත් අමුතු අමුතු තීන්දු ලැබෙයි. මතකනේ 2012 වැලිකඩ සිද්ධියේදී මියගිය සෙට් එක. ඒ මැරුන අය අතරේ ඒ දවස්වල පන්සල් වලට පැනල හාමුදුරුවරු මරල රජ කාලේ කඩු ,ඔටනු හොයපු සිද්ධි වල සැකකරවොත් හිටියා. මතක තියා ගන්න වැරදිකරුවො නොවෙයි සැකකරුවෝ. ඉතින් මෙහේ මරණ දණ්ඩනය ක්‍රියාත්මක උනත් එච්චරයි ,⁣ දේශපාලනඥයින් මැදිහත් වෙලා කරන අපරාධ වලට කොහෙන්හරි මිනිහෙක් අල්ලගෙන් ක්ෂණිකව නීතිය ක්‍රියාත්මක වෙද්දි සැබෑ අපරාධකරුවන් සුදු වතින් සැරසිලා පන්සල් යයි.

   අන්තිම පොයින්ට් එක තමයි මිනිස්සුන්ට නිවැරැදි වෙන්න අවස්ථාවක් දෙන එක. නැත්නම් second chance එකක්. ඉතිහාසයේ වුනත් මිනිස්සු බර ගාණක් මරපු අංගුලිමාල පැවිදිවෙලා රහත් වුනා කියනවනේ. බැරිවෙලාවත් එදා අංගුලිමාල රාජ පුරුෂයන්ට අහුවුණා නම් මොකද වෙන්නේ.සමහර මිනිස්සු අපරාධ කරල තියෙන්නේ තරුණ වයසට ආපු ගමන්ම , සමහර අපරාධ කරුවන් නොයෙකුත් මානසික ව්‍යාධීන් වලින් පෙළෙන මිනිස්සු . ඇත්තටම සමහර අපරාධකරුවන් උසාවියේ ඉඳන් හිරගෙදරට යවනවා වෙනුවට යවන්න ඕනෙ මානසික වෛද්‍යවරුන් ළඟට.
 මොන කරුණ සළකා බැලුවත් අපේ රටට මරණ දණ්ඩනය කියන එක සෙට් වෙන්නෙ නෑ. ක්‍රියාත්මක වුනොත්  තම තමන්ගේ ඇරියස් නම් කවර් කරගන්න එක , පොලිස් ලොක්කන්ට හිතෙන අය කුඩු තොගයක් දාලා අල්ලන ඒවා වගෙ නම් හරි හරියට වෙයි. අවසානයට ඇත්ත අපරාධකරුවන් සුදුවට ඉද්දි හයියක් නැති මිනිස්සු පිරිසකගේ බෙල්ල තොණ්ඩුවට හිරවෙයි.

Facts: amnesty international

Saturday, June 16, 2018

චීවරයට අත නොතබනු!

"හැම රටවැසියෙක්ම සිවුරක් පොරවගමු."  එහෙම කියල තිබ්බේ විදර්ශන කන්නංගර , fb එකේ.

  PK film එකේ pk දේවාලෙක කැටයකින් සල්ලි ⁣හොරෙන් අරන් ගුටි කන්න යද්දි උෟ    කරන්නේ දෙවියන්ගේ ස්ටිකර් දෙකක් කම්මුල දෙපැත්තේ අලවා ගන්නවා. ඇහුවම කියනවා self defense කියලා.pk  ට ගහන්න ආපු උන් දෙයියො කම්මුලේ දැක්කම ක්ෂණික පසු බසිනවා.
දැන් ඥාණසාර සාදු ටත් ජනාධිපති සමාවක් ලැබෙයි කියල චූටි රාවයක් යනවනේ. ගොඩක් වෙලාවට එහෙම වෙයි.(මෛත්‍රී ලොක්කටත් පිස්සු ජාතීවාදියෝ ටිකක් චූන් කරන්න හම්බ වෙන චාන්ස් එක).  ලංකාවෙත් විවිධාකාර තක්කඩියන්ට අර pk ට වගේ හොඳ self defense technique එකක් තියෙනවා . ඒ තමයි කරන තක්කඩි වැඩ සියල්ල සිවුරක් ඇඳන් කරන එක. නැත්නම් තමන්ට කර ගන්න ඕනේ තක්කඩි වැඩ ටික සියල්ලම සිවුරක් ඇඳන් ඉන්න එකෙක් ලව්වා කර ගන්න එක. මොකද එහෙම කරාම වැඩේ ඒ තරමට සාර්ථකයි. චීවරයට අත තියන්ඩ එපා යකෝ කිව්වම ඔක්කොම ඉවරයි. මං හිතන්නේ මේක ලංකාවේ නීතිය ආරක්ෂාව හැම පැත්තකින්ම ලොකු weak point එකක්. ඇස් දෙක විතරක් පේන බුර්කාව සමාජයට ආරක්ෂාවට කොයිතරම් තර්ජනයක්ද ඒ තරමටම තර්ජනයක් සිව්රක් දාන් ඉන්න මැරයෙක්. ඌට ඕනෙම තැනකට බොම්බයක් කුඩු ටිකක් පිස්තෝලයක් අරන් යන එක ගේමක් නෙවෙයි. කවුරුත් චෙක් කරන්න එන්නෙ නෑ. චීවරයට අත නොතබනු ! අන්න ඒ නිසා.ඔබ ගමක පන්සලක් ළඟ ජීවත්වෙලා ඉඩම් ප්‍රශ්නයකට හරි මොනව හරි ප්‍රශ්නයකට හාමුදුරුවන්ට එරෙහිව ග්‍රාම සේවක ළඟට පොලිසියට ගියොත් මොකද වෙන්නේ? ඔබ පැමිණිලි පාර්ශවය වුනත් ග්‍රාම සේවක හරි පොලිසිය හරි ආව ගමන් මුලින්ම කරන්නේ අර විත්තිකාර හාමුදුරුවන්ට වඳින එක. එතනින් එහාට සාධාරණයක් වෙයි කියල ඔබ හිතනවද. එහෙයි හාමුදුරුවනේ කියනවා මිසක්.

      බොහෝ හාමුදුරුවරු තමන් නීතියට අධිකරණයට ඉහළින් ඉන්නේ කියල හිතන්ව ඒ වගේ දේවලුත් බලපාලා ඇති.ඊට අමතරව මොලේ කළඳක් නැති මෝඩ දේශපාලුවන්ගෙ හයියත් බලපාලා ඇති.  දැන් මේ තත්වෙ උග්‍ර වෙලා. හැම මඟුලකටම මැදට පැනල වැඩේ අල කරල දාන්නේ හාමුදුරුවරු. ඔවුන්ට දහම් දැනුමකුත් නෑ. නීතිය ගැන දැනුමකුත් නෑ. විද්‍යා දැනුමක් කොහොමත් නෑ.දන්නෙ  මැදට පැනල ගිරිය පුප්පගෙන කෑ ගහන්ඩ විතරයි. ඒ වුනත් එයාලගේ දායකයන්ට ඒ හැසිරීම ප්‍රශ්නයක් නොවෙයි. ඔවුන් හාමුදුරුවන්ගෙන් බලාපොරොත්තු වෙන්නෙත් ඒ වගේ හැසිරීමක්. පන්සල් වල හාමුදුරුවරු මේ තරම ප්‍රචණ්ඩ විනයක් නැති තැනකට ගිහින් හැසිරෙන්න දන්නැති සංයමයකින් කතා කරන්න බැරී වීම ගැන තියෙන්නේ ලොකු ප්‍රශ්නයක්. ළමයි බලෙන් දහම් පාසල් ගෙන්න ගන්න දතකන අනෙක් හාමුදුරුවරුන්ට තමන්ගේ සෙසු සංඝ සමාජයේම සහෝදර හාමුදුරුවන්ගේ අවිනීත ක්‍රියා පේන්නෙ නෑ. ඒවට  විරුද්ධව කතා නොකරන ගමන් ගිහි සමාජේ ළමයින් ශික්ෂණය කරන්න හදන එකත් විහිළුවක් .
   දැන් ඔයවගේ දේවල් වලට විරුද්ධව කතා කරන එකත් සෙල්ලම් වැඩක් නොවෙයි. එහෙම කතා කරපු ගමන් නානාවිධි නම්බුනාම නොමිලේම හම්බ වෙනවා. NGO කාක්කෝ, පල්ලි කාක්කෝ,  විතරක් නොවෙයි සිවුරු තක්කඩින්ගේ හැම ක්‍රියාවක්ම සාධාරණීකරණය කරන ජාතියේ පිනට පහළ වුන අයියල මල්ලිලා ටික ජාතිය ගැන කතා කරාට අහන්නෙම ජාතකේ ගැන. ඒ අස්සේ උන් උන්ගෙ අදහසට විරුද්ධ උන්ගෙ මෑණිවරු බල්ලො එක්ක රමණය කරාද කියලත් අහනවා. පොලිම් ගැනත් කියවනවා. මං හිතන්නෙ මැතිණිගේ කාලේ පාං පෝලිම් වෙන්ඩ ඇති. ගිහියො නම් තව කමක් නෑ සිවුරු දාන් ඉන්න එවුනුත් එහෙම අහනවා නම් ඉතින් එහෙව් උන්ගෙ පන්සල්වල සිල් ගන්න ගෑණුන්ට අබ සරණම තමයි . කතාව නතර කරන්න හිතුනා අජිත් කුමාරසිරිගේ සිංදුවක කෑල්ලකින්

" පන්සල් වලට අරක්කු
රටටම පිරිත්පැන්.
  එතකොට අපිට?
අපිට තමයි ආදරේ"